Граѓани за Европска Македонија

На 30 јуни 2011 година, во ГЕМ клубот се одржа проекција на епизода од документарниот циклус на Би-Би-Си за францускиот пацифист и банкар Албер Кан, кој во првата половина од дваесетиот век создал огромна фотографска архива за планетата, со цел да промовира мир и да ја документира културната разновидност во светот. Колекцијата за Европа го овековечува појавувањето на големите унифицирани национални култури, заради кои исчезнува богатиот мозаик на регионални јазици и локални идентитети ширум континентот.


Процесот на создавање нации е особено комплексен на Балканот и фотографиите на Кан токму тоа го покажуваат. Националното обединување по примерот на Западна Европа има катастрофален ефект за луѓето од османлиска Македонија, но чудесните фотографии одново ни го откриваат исчезнатиот космополитски дух на овој дел од континентот.

По завршувањето на проекцијата, следуваше дискусија со присутните. Модератор на дискусијата беше Кристина Николовска, а за филмот говореа Ирена Стефоска и Драги Георгиев.